علی ظفر اور میشا شفیع کا 8 سال سے جاری ہراساں کرنے کا کیس بالآخر گزشتہ روز ختم ہوا جب عدالت نے علی ظفر کو فاتح ثابت کیا اور میشا شفیع پر جرمانہ عائد کیا۔ دونوں کے درمیان تنازع اپریل 2018 میں اس وقت شروع ہوا جب میشا شفیع نے علی ظفر پر ہراساں کرنے کا الزام لگایا۔
علی ظفر اور ان کے اہل خانہ کی جانب سے ہراساں کرنے کے الزامات کی سختی سے تردید کی گئی اور انہوں نے میشا شفیع کے خلاف ہتک عزت کا مقدمہ دائر کر دیا۔ گزشتہ روز عدالت نے میشا شفیع کے خلاف علی ظفر کے ہتک عزت کیس کا 8 سال بعد فیصلہ سنایا جس کے مطابق علی ظفر کو بے گناہ قرار دیا گیا جب کہ میشا شفیع پر 50 لاکھ روپے جرمانہ عائد کیا گیا۔
اقرار الحسن سید اور دیگر کئی مشہور شخصیات علی ظفر کے حق میں آگئیں جب کہ عفت عمر میشا شفیع کے خلاف عدالتی فیصلے کے باوجود ان کے ساتھ مضبوطی سے کھڑے ہیں۔ اپنی ایکس پوسٹ میں اقرار الحسن نے میشا شفیع کے خلاف سخت ریمارکس کا استعمال کیا۔
انہوں نے لکھا کہ میشا شفیع کی جانب سے جنسی طور پر ہراساں کرنے کے الزامات کے حوالے سے ان کے خلاف دائر کیا گیا مقدمہ علی ظفر جیت چکے ہیں اور عدالت نے میشا شفیع پر 50 لاکھ روپے کا جرمانہ عائد کیا ہے، اس جھوٹے الزام کی وجہ سے علی ظفر کو جس تکلیف اور حالات سے گزرنا پڑا اس کے مقابلے میں یہ جرمانہ اور سزا انتہائی معمولی ہے، ایسے کیسز میں جھوٹے الزامات لگانے والی خواتین کو کمزور مثال بنانا چاہیے۔
اس کے باوجود علی ظفر اس معاملے میں ثابت قدم رہنے اور جھوٹے الزام لگانے والے کو منطقی انجام تک پہنچانے پر مبارکباد کے مستحق ہیں۔
