ڈائریکٹر خلیل الرحمان قمر کو نامعلوم شخص کی جانب سے ڈیڑھ کروڑ روپے بھتہ مانگنے کی دھمکیاں موصول ہوئیں، مطالبہ پورا نہ ہونے پر فحش ویڈیو لیک کرنے کی دھمکی دی گئی۔
لاہور پولیس نے واقعہ کا نوٹس لیتے ہوئے تحقیقات کا آغاز کر دیا ہے۔ خلیل الرحمان قمر کے مطابق وہ گھر پر تھے کہ نامعلوم فون کرنے والے نے ان سے رابطہ کیا، انہیں دھمکیاں دیں اور بار بار کالز اور میسجز کے ذریعے ڈیڑھ کروڑ روپے کا مطالبہ کیا۔
کال کرنے والے نے متنبہ کیا کہ اگر رقم ادا نہ کی گئی تو آمنہ عروج پر مشتمل ایک فحش ویڈیو وائرل کر دی جائے گی۔
معروف مصنف نے بتایا کہ انہیں مسلسل بھتہ خوری کی کالز اور میسجز موصول ہو رہے تھے جن میں مطلوبہ رقم کی عدم ادائیگی پر سنگین دھمکیاں دی گئی تھیں۔
ادھر ڈی آئی جی آپریشنز لاہور محمد فیصل کامران نے معاملے کا نوٹس لیتے ہوئے واقعے کی تحقیقات کے لیے خصوصی ٹیم تشکیل دے دی۔ پولیس حکام کا کہنا ہے کہ ملزم کو جلد انصاف کے کٹہرے میں لایا جائے گا اور اس سے مکمل تفتیش جاری ہے۔
