صدر ڈونلڈ ٹرمپ نے ایک ایگزیکٹو آرڈر جاری کیا جس میں کہا گیا ہے کہ “امریکہ قطر کی سرزمین، خودمختاری، یا ریاست کے اہم انفراسٹرکچر پر کسی بھی مسلح حملے کو امریکہ کے امن اور سلامتی کے لیے خطرہ سمجھے گا”۔
یہ اہم پیش رفت اسرائیل کی جانب سے گزشتہ ماہ دوحہ پر حملے کے بعد سامنے آئی ہے اور ٹرمپ نے غزہ امن منصوبہ اس امید کے ساتھ پیش کیا ہے کہ انہیں امن کا نوبل انعام ملے گا۔
اپنے تازہ ترین ایگزیکٹو آرڈر میں، ٹرمپ نے “قریبی تعاون، مشترکہ مفادات، اور ہماری مسلح افواج کے درمیان قریبی تعلقات” کو تسلیم کیا اور “غیر ملکی جارحیت سے ریاست قطر کو لاحق مسلسل خطرات کی روشنی میں” حفاظتی ضمانتیں فراہم کیں۔
ٹرمپ نے مزید کہا کہ “قطر نے امریکی افواج کی میزبانی کی ہے، اہم سیکورٹی آپریشنز کو قابل بنایا ہے، اور مشرق وسطیٰ اور بیرون ملک امن، استحکام اور خوشحالی کے حصول میں ایک ثابت قدم اتحادی کے طور پر کھڑا ہے۔
انہوں نے قطر کے کردار کا بھی ذکر کیا “ایک ثالث کے طور پر جس نے اہم علاقائی اور عالمی تنازعات کو حل کرنے کے لیے امریکہ کی کوششوں میں مدد کی ہے”۔
انہوں نے کسی بھی حملے کی صورت میں امریکہ اور قطر کی ریاست کے مفادات کا دفاع کرنے اور امن و استحکام کی بحالی کے لیے سفارتی، اقتصادی اور اگر ضروری ہو تو فوجی سمیت تمام قانونی اور مناسب اقدامات اٹھانے کا وعدہ کیا۔
