فلسطینی علاقے کی سول ڈیفنس ایجنسی کے مطابق غزہ میں اسرائیلی فضائی حملوں میں بچوں سمیت 32 افراد ہلاک ہو گئے۔
اس ماہ کے اوائل میں امریکی ثالثی سے ہونے والی جنگ بندی کے دوسرے مرحلے میں داخل ہونے کے باوجود، فلسطینی علاقے میں تشدد کا سلسلہ جاری ہے، اسرائیل اور حماس دونوں ایک دوسرے پر معاہدے کی خلاف ورزی کا الزام لگا رہے ہیں۔
تازہ ترین خونریزی اس وقت ہوئی جب اسرائیل نے اعلان کیا کہ وہ غزہ اور مصر کے درمیان رفح کراسنگ کو (آج) اتوار کو “لوگوں کی محدود نقل و حرکت” کے لیے دوبارہ کھول دے گا۔
حماس اتھارٹی کے تحت کام کرنے والی ایک ریسکیو فورس سول ڈیفنس ایجنسی نے کہا، “آج صبح سے اب تک مرنے والوں کی تعداد 32 ہو گئی ہے، جن میں زیادہ تر بچے اور خواتین ہیں۔”
ایجنسی کے ترجمان محمود بسال نے ایک بیان میں کہا، “رہائشی اپارٹمنٹس، خیموں، پناہ گاہوں اور ایک پولیس اسٹیشن کو نشانہ بنایا گیا، جس کے نتیجے میں یہ انسانی تباہی ہوئی۔”
اے ایف پی کے ایک صحافی نے رپورٹ کیا کہ غزہ شہر کے رمل محلے کی ایک اپارٹمنٹ کی عمارت میں ایک یونٹ مکمل طور پر تباہ ہو گیا تھا، اور اس کے مکینوں کے خون کے چھینٹے نیچے کی سڑک پر دکھائی دے رہے تھے۔
خاندان کے ایک رشتہ دار سمر العطبش نے اے ایف پی کو بتایا، “تین لڑکیاں سو رہی تھیں، ہمیں ان کی لاشیں گلی میں ملی ہیں.”
