وزیراعلیٰ خیبرپختونخوا سہیل آفریدی نے کہا ہے کہ ان کی جماعت اب آئندہ کا لائحہ عمل طے کرنے کے لیے اجلاس بلائے گی۔
پارٹی کے بانی اور سابق وزیر اعظم عمران خان سے ملاقات کی تردید کے بعد میڈیا سے گفتگو کرتے ہوئے انہوں نے کہا کہ “چونکہ تمام قانونی راستے ناکام ہو چکے ہیں، ہم اپنے اگلے اقدامات پر بات کریں گے اور جلد ہی لائحہ عمل کا اعلان کریں گے۔”
آفریدی کا کہنا تھا کہ ’تین ججوں کے حکم کے باوجود مجھے آج چوتھی بار اپنے لیڈر سے ملنے سے روک دیا گیا،‘ ان کا مزید کہنا تھا کہ ’کوئی اتنا طاقتور شخص بغیر کسی نتیجے کے خوف کے آئین اور عدالتی احکامات کو پامال کر رہا ہے‘۔
اڈیالہ جیل کے باہر میڈیا سے بات کرتے ہوئے، انہوں نے کہا کہ انہوں نے تمام قانونی ذرائع کی پیروی کی ہے – پنجاب اور وفاقی وزارت داخلہ کے ساتھ ساتھ چیف جسٹس آف پاکستان کو بھی خط لکھا ہے اور اس کے بعد اسلام آباد ہائی کورٹ سے رجوع کیا ہے۔
پی ٹی آئی کے بانی عمران خان سے ملنے کی بار بار کوششوں کے حوالے سے آفریدی کا کہنا تھا کہ ‘میں دو سال سے اپنے لیڈر سے نہیں ملا، دیکھتے ہیں کہ وہ کب تک مجھے ان سے ملنے سے روک سکتے ہیں’۔
انہوں نے کہا کہ وہ پاکستان میں کسی بھی ایسی پالیسی کے خلاف ہیں جسے وہ غلط سمجھتے ہیں۔ آفریدی نے کہا کہ خیبرپختونخوا میں مارٹر اور ڈرون حملوں نے پورے خاندان کو ہلاک کر دیا۔
