مجھے حارث، شاہین اور نسیم دو، میں انہیں میگا اسٹار بنا دوں گا: شعیب اختر.
سابق فاسٹ باؤلر شعیب اختر نے پاکستان کرکٹ بورڈ (پی سی بی) پر زور دیا ہے کہ وہ اہم تیز گیند بازوں شاہین آفریدی، حارث رؤف اور نسیم شاہ کو وقفہ دے جبکہ بورڈ کی انتظامیہ میں بڑی تبدیلیوں کا بھی مطالبہ کیا ہے۔
اسلام آباد میں کیپٹل پریمیئر لیگ (سی پی ایل) پر دستخط کی تقریب سے خطاب کرتے ہوئے، جہاں وہ مہمان خصوصی اور برانڈ ایمبیسیڈر تھے، اختر نے قومی ٹیم کی سلیکشن پالیسیوں پر تنقید کی۔
انہوں نے کہا کہ مجھے سمجھ نہیں آتی کہ کھلاڑیوں کو کیوں ڈراپ کیا جاتا ہے اور پھر واپس لایا جاتا ہے۔ اگر میرے پاس بابر اعظم، شاہین آفریدی، حارث رؤف اور نسیم شاہ جیسے کھلاڑی ہوتے تو وہ اب تک میگا اسٹار بن چکے ہوتے۔
چیمپیئنز ٹرافی میں پاکستان کی کارکردگی پر مایوسی کا اظہار کرتے ہوئے اختر نے کرکٹ کی حالت کا موازنہ ملک میں ہاکی کے زوال سے کیا۔
انہوں نے کہا کہ انتظامیہ اور ٹیم میں بار بار تبدیلیاں نتائج نہیں دے رہی ہیں۔ پی سی بی کے چیئرمین محسن نقوی کی انفراسٹرکچر کو بہتر بنانے کی کوششوں کا اعتراف کرتے ہوئے اختر نے پالیسی اصلاحات کی ضرورت پر زور دیا۔
انہوں نے مزید کہا، ’’نقوی کرکٹ کی بہتری کے لیے کام کرنا چاہتے ہیں، لیکن انھیں اپنے اہم فیصلہ سازوں کو بھی تبدیل کرنے کی ضرورت ہے۔‘‘
سابق فاسٹ بولر نے کھلاڑیوں کے ورک لوڈ مینجمنٹ کی اہمیت کو دہراتے ہوئے اصرار کیا کہ شاہین، حارث اور نسیم کو ان کی کارکردگی اور فٹنس برقرار رکھنے کے لیے آرام دیا جانا چاہیے۔
